高鐵一役後，政府成日想同「80後」溝通，青年事務委員會唔敢怠慢，近期就搞咗一系列青年交流會，請班高官出席。講白啲，一嚟係畀啲官員表現吓，二嚟係畀個機會「80後」發洩心中怨氣，向官員集體發炮。呢類交流會，去親嘅高官都冇乜好下場，邱副咁都願意接受邀請，顯然想趕及喺政府派副局政助中期成績表前有所作為。

同年輕人溝通固然係好事，但房屋問題熱烘烘，社會怨氣甚深，尤其「80後」都炮轟過政府冇方法紓緩住屋問題，喺高樓價嘅情況底下，佢哋根本上唔到車，想買居屋政府又一味拖字訣。

邱副喺青年交流會面對台下觀眾，提問嘅尖銳程度絕對唔會低過班「的士大佬」同菜園村村民，如果邱副答非所問，或者喺席上一味砌詞推搪，呢班「80後」就算唔堵塞交通或者放火燒村，都會大力柴台，隨時重演「高鐵事件」，只係被圍嘅對象，由立法會變成邱副啫。

溝通不良屢被詬病

大家應該記得，邱副上任以嚟，因為「溝通不良」，曾經引起唔少政治風波。○八年佢因為唔覆「的士大佬」電話，釀成一場的士堵塞交通風波；早前佢同菜園村村民及「新界王」劉皇發開三方會議前臨時甩底，兼電話打極都唔通，畀村民狠批擺官威，搞到要局長鄭汝樺介入，真係鑊鑊新鮮鑊鑊甘，令人對邱副嘅表現「另眼相看」。

今次邱副唔使「80後」三催四請，變咗自動獻身受靶，恐怕係搬石頭砸自己隻腳噃。最後奉勸邱副，今次出席青年交流會，唔好又臨時「甩底」喇，咁樣唔單止好肉酸，班「80後」仲肯定會鬧爆佢！