終審法院常任法官包致金姪女三犯襲警仍獲輕判，惹起全城公憤，更有市民發起遊行示威抗議，誓保司法公義。

不過，本身係資深大律師嘅立法會議員、大狀黨黨魁余若薇前日提及抗議行動時話：「示威到某程度，或可構成對司法機構或司法人員施壓，亦可能引致藐視法庭罪。」

叮！對司法不公表達關注等同「藐視法庭」？靠嚇咩！咁嘅言論居然出自開口「民主」、埋口「人權」嘅泛民主派政客，認真諷刺。

睇吓市民點回應：尋日有近千名市民毋懼恐嚇上街遊行抗議，呼籲當局還司法一個公道。參與嘅除咗着晒黑衫嘅網民、關注事件嘅自由黨成員，仲有退休警員。一句講晒，群情洶湧。

有退休警員直斥余若薇講錯嘢，市民有表達言論嘅自由，遊行示威係宣洩嘅渠道，法官有獨立思考，判決唔受輿論壓力影響；呢次案件冇陪審團，干擾無從說起，根本唔存在藐視法庭。

鬧得啱！市民嘅眼睛係雪亮嘅，是非黑白清清楚楚，更何況，參加遊行嘅自由黨同退休警務人員，對乜嘢係藐視法庭，有足夠專業知識判斷，幾時輪到余若薇指手畫腳呀！

連保安局副局長黎棟國都話，香港係法治社會，有言論自由，容許市民表達訴求。立法會議員葉劉淑儀更批評余若薇，身為公眾人物唔應該咁講嘢，質疑佢平時高喊民主自由，問題涉及法院判決就以「藐視法庭」開脫，係雙重標準。

奇怪嘅係，市民炮轟司法不公，尋日上街為民請命嘅只得自由黨一個政黨咁大把，其他平時高唱民主自由嘅泛民主派政黨同民建聯竟然變晒鵪鶉，粒聲都冇。請問呢啲政黨咁又算唔算雙重標準呢？

對港人來講，司法公正標準只有一個，就係不偏不倚。余大狀係終審法院首席法官李國能嘅首徒，而律政司司長黃仁龍就係李國能最後一個徒弟，師徒之間關係密切。咁嘅關係，大家認為對不偏不倚又有冇影響呢？

話時話吖，當年余若薇同班大狀，着晒黑衫「沉默遊行」抗議全國人大釋法。太一叮想知道，同樣都係遊行示威，只係參加嘅人唔同咗，點解當年叫「維護法治精神」，呢次就變咗「藐視法庭」呢？唔通真係法律面前，人分等級，權貴優先？照咁嘅邏輯，權貴親朋戚友犯事屢獲輕判，又真係「合情合理」噃。叮！