海洋公園保育基金主席Judy陳晴除咗關心小動物外，對小朋友亦一樣好有耐性，尋日佢去海洋公園幫熊貓盈盈、樂樂慶祝生日，見到一班同熊貓盈盈樂樂同一日生日嘅小朋友，即時母性大發不停逗佢哋玩，期間有兩個男仔玩到郁手郁腳，Judy好溫柔咁循循善誘佢哋，兩個小朋友即時乖晒，認真犀利。
Judy話好鍾意BB，所以屋企養咗唔少動物BB，對於人類BB就更加唔抗拒啦，難怪身材豐滿咗唔少嘅佢講笑咁話，希望今年可以養番個「老虎BB」，不過仲有半年時間，唔知趕唔趕得切。
至於佢喺四川嘅寶貝熊貓女晴晴，今年四歲，已經成熟到可以做媽媽，依家仲有兩個男朋友揀緊添，佢哋一隻喺美國返嚟，另一隻就係奧運寶寶，Judy話邊隻做佢「女婿」都冇所謂，淨係希望可以快啲做婆婆抱孫。