醫管局主席胡定旭最近頻頻見報，事關醫管局行政總裁蘇利民辭職，加深醫管局管理層「貧血症」。醫管局管轄全港一百六十間公立醫院同門診，體制龐大，運作咗二十年，早就機能退化，肥胡喺醫管局內遇到嘅奇難雜症，就更加係唔講唔知。
就連醫管局主席嘅任期問題都係肥胡嘅困擾。早前，政府唔理「六六原則」，即公職人員原則上唔應該同一時間坐多過六個位、同一個位唔應該做多過六年嘅規定，委任肥胡做多兩年醫管局主席，惹嚟非議。肥胡有另一套觀點，佢話醫管局體制龐雜，外人入到嚟，頭兩年都處於摸索階段，再做四年逐漸上手，又話要走，對醫管局唔好，所以佢建議政府特別放寬委任醫管局主席同成員嘅任期上限至八年。
肥胡早前接受本報訪問時講起「院霸」（長期住院唔走嘅病人）問題，憶述有一次去九龍醫院巡房，見到一位婆婆孤伶伶，佢就安慰婆婆好快可以出得院。點知翌日婆婆嘅兒子不滿，怒氣沖沖質問院方，點解肥胡叫佢阿媽出院，令肥胡可能成為首個被病人家屬投訴嘅醫管局主席。