減磅成功後嘅中策集團主席馬時亨，衣櫃入面嘅舊衫幾乎全部唔啱着，由恤衫、西裝到西褲，通通要買過。早前撞見肥亨快步走入意大利頂級服裝品牌Loro Piana睇衫，一嚟就揀恤衫，話咁快睇中四件，包括白恤衫、淺藍間條、深藍間條同深紫色間條恤衫，四件各有特色，肥亨都揸唔定主意，兩名店員打孖上招呼佢，將啲恤衫鋪晒喺玻璃枱上面，等肥亨慢慢睇真啲。
肥亨索性走入更衣室慢慢試，最後扑錘買咗三件。買到心頭好，肥亨春風滿面咁離開，見到記者顯得有啲愕然，仍然好有禮貌咁打招呼：「乜你哋喺度嘅？」
原來佢係Loro Piana擁躉，因為買得多，已進身VIP。佢話店員通知佢返咗新貨，所以嚟睇吓，平時買衫都係由太太代勞。三件Loro Piana恤衫合共約九千幾蚊，肥亨話價錢比喺意大利買貴啲，但難得買到靚衫，畀多少少都值得。