龍躉四食嘅菜式包括沙參玉竹燉龍躉骨、荷香麒麟蒸龍躉球（圖）、碧綠炒龍躉球同米湯浸龍躉頭腩。酒家副經理Simon話香港八、九成龍躉嚟自台灣，佢哋酒樓供應嘅龍躉、青斑就係台灣嚟嘅，所以廚師炮製甚有心得。

荷香麒麟蒸龍躉球做法係將魚背肉起片，再伴以金華火腿同冬菇片，放喺鋪咗荷葉嘅竹籠蒸至八成熟，最後落番上湯令魚肉熟透即可上碟，食落肉質鮮甜彈牙，一眾座上賓客都讚不絕口。除咗台灣駐港機構觀光協會香港辦事處主任陳造明、遠東貿易中心主任陳光丕之外，有份大快朵頤嘅仲有本港台灣食品入口商華記永昌、味一食品同賓仕洋行等代表。