09/08/2010

播放本新聞相關短片

政情:李慧琼都睇唔過眼 踢爆Eva篤數

樓價高企,市民叫苦,但政府唔做嘢,總係藉口多多,一時話市場主導,一時又話既定政策好難改。建制派嘅九龍西議員Starry李慧琼都睇唔過眼,尋日喺大氣電波踢爆Eva鄭汝樺執掌嘅運輸及房屋局篤數,拖延解決香港住屋難問題。

Starry喺港台英文節目《給香港的信》指出,最近財經專欄作家好興用一個新詞嚟形容香港人,就係「全球第一大房奴」,意指香港房屋供求失衡,樓價拋離市民購買力,香港人唔係買唔起樓,就係要供死一世樓,講起都心酸。

香港人變房奴,Starry踢爆當局責無旁貸。佢指出,運輸及房屋局提供嘅資料顯示,香港有二百五十萬個住宅單位,而住戶總數只係二百三十萬個,表面睇嚟,香港住宅供應充足冇問題。不過,佢隨即踢爆呢個其實只係假象,並非真相,事關樓價節節上升,好多年輕夫婦根本「上唔到車」,所以先至迫於同父母甚至外父外母同住,如果唔係樓市咁畸形,香港住戶點止二百三十萬個?Starry批評依家樓市狂飆,就知求過於供啦,當局一定要做嘢。

九招十二式冇料到

Starry又踢爆,Eva早前推出嘅遏樓價「九招十二式」藥力短暫,從最近種種樓市迹象分析,香港樓價已快速重拾升軌,而且仲逐步逼近九七年水平添。Starry講嘢點到即止,但盲嘅都睇得出,Starry嘅潛台詞係批評Eva無力控制樓價,「九招十二式」只係虛招,根本冇料到。

樓價係市民最關心嘅問題,十月施政報告一定走唔甩要交代,到時身為相關政策局局長嘅Eva勢成眾矢之的。呃呃氹氹,通常冇好下場,八達通被揭出售客戶私隱資料圖利之初,行政總裁陳碧鏵就係因為講大話,以圖掩飾真相,最終誠信破產,要請辭息公憤。Eva要吸取教訓呀!