做得咁辛苦，無非為生活，所以，最近巴士司機要求公司調高加薪幅度，都無可厚非嘅。可惜勞資雙方傾嚟傾去都傾唔掂，卒之搞到要罷工、靜坐，唉，咁就大件事喇！

工會話喎，周一將如期發起工業行動，其中新巴工會率先罷工，其餘三巴司機則會按章工作，唔排除周二接力繼續罷工。你知喇，周一係工作日，大部分打工仔要返工，四巴齊齊爆發工潮，雖然唔係所有司機都參與，但必定引起全港交通大混亂，尤其係港島南區，港鐵唔到，巴士罷駛，居民點出入呢？巴士司機爭取權益，本來值得同情，但如果搞到無辜市民，咁就要三思喇。

四巴工潮連環爆，交通災難一觸即發，市民人心惶惶，運輸署只係輕描淡寫咁話，工業行動無可避免影響交通，所以市民當日應提早出門，僱主應體諒遲到員工喎。咁即係點吖？即係閣下自理，你死你事囉。

叮！鬼唔知阿媽係女人咩，巴士工潮會影響交通，係人都知喇，問題係當局點樣應對至得㗎，嗱，唔好又畀人批死，到時又搞到倒瀉籮蟹呀。其實，過往唔少交通混亂，都係因為當局安排不當引起，例如次次鬧市爆水管，幾乎都造成大塞車。又例如運輸署前年推出的士收費短加長減方案，因為安排不當，引發新界的士抗爭，二百幾架綠的堵塞機場通道，搞到站內八百幾架的士大打蛇餅，逼到水洩不通，七國咁亂。今次四巴工潮影響範圍更加大，當局係咪應該吸取教訓，及早做好應對措施呢？

嗱，南區區議員就醒喇，決定當日合資租旅遊巴，接載區內居民返工。話時話，呢啲唔係政府嘅責任咩？如果次次都要市民自己顧自己，咁仲要政府嚟做乜呢？

講到尾，政府靠得住，豬乸會上樹。四巴工潮擾民添亂，對任何人都無好處，最好嘅解決辦法就係以和為貴，巴士公司體諒司機，司機顧及市民，大家坐低四四六六傾掂佢，咁咪一天都光晒咯！