本文重點
霍家第三代霍啟人早前涉嫌酒後駕駛撞車，下月要返警署報到，影響幾大都未知。前日香港菁英會舉行第三屆就職禮，副主席啟剛都有出席，問到佢有冇鬧啟人，佢好淡定話：「鬧佢？冇呀！佢都廿幾歲人啦，識諗o架喇。」跟住佢又幫細佬說好話：「細路仔揸車發生意外就梗有啦，佢以後都會小心揸車o架喇！」
領軍參加青年奧運會
本月十四日，啟剛會以團長身份，率領十五名運動員到新加坡參加首屆青年奧運會（Young Olympic Game），總共參加八個項目。首次領軍，爸爸霍震霆有冇錦囊相贈呢？啟剛只係話，由於運動員平均年齡為十四至十八歲，首要係安全至上，要好好照顧每一個運動員，唔希望有任何意外發生，個個平安返港。
Neway太子爺薛嘉麟當晚都在席，問起佢老友范駿華（Andrew）喺o靚模船河派對後少咗露面，薛嘉麟話唔係，咁Andrew有無畀老婆扭耳仔呢？薛嘉麟拋咗句：「平生不作虧心事，半夜敲門也不驚。」未結婚就話「敲門也不驚」啫，Andrew結咗婚喎？薛嘉麟繼續幫老友講嘢，佢話：「呢單嘢係畀人整蠱o架！」唔知邊個咁大整蠱呢？