政府憲報成日搞錯嘢，最新一期又要登勘誤，今次唔係寫錯人名、搞錯公告，而係環境局局長邱騰華嘅假期，事關憲報早前登咗邱騰華由本月四日到十二日放假，日前就改為四日放到六日，七日又放到十二日。點知呢頭登咗勘誤，轉過頭就見邱騰華尋日以局長身份出席個論壇，小小嘅假期安排，點解會咁混亂㗎？
問番環境局，佢話邱騰華尋日的確係放假，不過，佢好關注大浪西灣保育嘅問題，所以假期中都要親自出席尋日舉行嘅研討會。呢番話雖然顯示邱騰華肉緊分內嘅事，但就有忽視政府行政安排之嫌，事關問責局長同高級官員放假要刊憲，主要係涉及權力同責任轉移，呢頭登憲報，嗰頭又以局長身份出席公開場合，戲弄公眾事小，擾亂政府行政就事大嘞。
據講，邱騰華出席個活動時，劈頭就澄清自己係放緊假，不過，佢放八日假就搞到憲報勘誤又「失誤」，有關部門真係要多謝佢。