網絡嘅威力愈來愈勁，特首辦都要招聘一個專門負責管理特首facebook同網站嘅項目主任，每個月嘅人工高達二萬三千至二萬七千蚊，對好多打工仔都好吸引。負責統籌呢個項目嘅特首辦主任譚志源（Raymond）早排放咗兩個禮拜假，同屋企人去咗法國巴黎同瑞士日內瓦，佢就示範活用facebook，不時更新資料同照片。
唔講唔知，Raymond九一至九四、九八至○一年派駐過日內瓦，囡囡出生無幾耐就跟佢過咗瑞士，一路喺當地讀到小一，細仔就更加係喺當地出世，亦喺當地讀幼稚園。今次一家人故地重遊，除咗去舊屋同囡囡讀過嘅小學緬懷一番，Raymond仲特登去一間叫「福祿壽」嘅中菜館食飯，呢間菜館好出名，佢喺日內瓦工作時仲不時喺嗰度宴請外國代表，難怪記憶猶新。返港後，Raymond○九年曾經去日內瓦開會，但三、四日都困喺酒店，無機會重遊故地，所以今次全家人齊齊踏上回顧之旅。