暑假猛片如雲，《反斗奇兵》第三集就吸引咗好多粉絲，好似玩具大王蔡志明個仔蔡加讚，佢話，由細到大睇過咁多戲，最深刻係小學生時睇嘅《反斗奇兵》，從此愛上戲中嘅「牛仔胡迪」。不過，第二集同依家上映緊嘅第三集，佢都分別等足四年同十一年，真係等到頸都長埋。
十一年之中，加讚都話自己變咗心，鍾意嘅角色已由牛仔胡迪變成薯蛋頭先生同太太，仲有恐龍泡泡龍，相當可愛。嚟緊加讚仲想去睇靚仔里安納度狄卡比奧主演嘅《潛行凶間》。佢話，細個成日去睇戲，皆因佢媽咪蔡李惠莉係個戲迷，經常帶埋佢一齊，至於爸爸就鍾意靜，加上公司業務繁忙，好少一齊外出睇戲。
不過，蔡太每逢睇過乜嘢好戲，都會等影碟推出買隻返屋企同蔡生分享，仲話好戲不妨一睇再睇。蔡宅有一個私人影院，蔡太平均一星期會欣賞一至兩齣戲，但新戲就要去戲院睇！