天燈節帆船賽拋錨

盛事基金舊年十月批出二千五百幾萬搞六個大型項目，LV帆船節同今年三月搞嘅梅窩天燈水燈節，天燈節原本諗住吸引四萬人參觀，點知最後得兩萬幾人去，人數遠遠唔達標。加上本港航空交通繁忙，放天燈有諸多限制，唔可以一次放超過四個天燈，兼唔可以放得太高，搞到玩過嘅市民都大叫冇癮。最慘仲係打算用嚟打破世界紀錄，以提升知名度嘅「巨型天燈」未離地已經自焚，認真冇陰功。

即使上個月搞嘅龍舟嘉年華吸引咗十幾萬人參觀，但當時「惡導遊」阿珍謾罵遊客事件炒得火熱，嘉年華嘅宣傳都被冚過，Jeffrey一番心機又浪費咗。

Jeffrey話，佢完全唔覺得自己黑仔喎，今次LV帆船賽搞唔成係就係好可惜，不過其他地方亦取消咗，佢仲話，如果真係黑仔，賽事就改咗去香港最大嘅競爭對手新加坡度搞！