保良局副主席鄭錦鐘（Eric）係半個新加坡地膽，上月中，佢嘅大仔鄭泳舜生日，Eric於是同埋全家人過去歎世界，仲入住開業只有個幾月嘅「濱海灣金沙酒店」，喺五十五樓空中花園試游全世界最大戶外泳池。人生第一次居高臨下游水，Eric話，好彩冇畏高症喎。
Eric早年投資新加坡，好熟悉當地情況，今次度假，揀咗距離獅城只有一小時船程嘅民丹島，同行仲有太太、大仔、新抱同大孫。
民丹島碧海藍天，Eric趁機同太太打番場高球。新加坡著名嘅「濱海灣金沙酒店」新開張，裝修甚為奢華，Eric租咗幾晚歎世界，房租每晚約二千港元。
Eric大讚新酒店物有所值，租客可以免費參觀建喺五十五層大廈頂端嘅空中花園，仲有一百五十米泳池供住客暢泳。
酒店仲設有大型賭場，Eric本來無諗住賭錢，但話晒一場嚟到，聽太太話落注一百元坡紙買咗一鋪「細」，結果贏咗五百港元，見好就收，拉隊去擦番餐著名胡椒蟹。