本文重點
八達通出售客戶個人資料同私隱圖利，搞到全城盡興，市民鬧爆八達通同港鐵管理層外，亦希望加強保障私隱，啱啱上任嘅個人資料私隱專員蔣任宏喺做郵政署署長任內爆出侵犯私隱嘅事，上任以來幾乎日日畀人踩場，尋日香港人權監察總幹事羅沃啟更加提議，本港應該立法訂定私隱專員所需嘅質素同挑選嘅程序，明顯要堵塞家吓挑選專員冇質素考核嘅漏洞。蔣任宏嘅委任引起社會上咁多反對聲音，政府好應該交代吓以乜嘢「質素」標準揀佢？費事社會上所託非人嘅憂慮繼續擴大。
暗嘲背景往績質素唔掂
羅沃啟尋日喺個電台節目大講本港保護人權嘅工作，但就全程唔提新任專員蔣任宏，佢除咗支持擴大私隱專員公署嘅權力外，仲認為本港挑選保護人權架構嘅負責人時，應該以聯合國訂立嘅《巴黎原則》為基礎，人選亦要符合「背景、往績、質素」三大標準。
羅解釋，背景同往績可以令人選有相當意識同警覺性，同時有知識同經驗，確保（佢領導嘅）機構能夠真正捍衞人權價值，而且香港應「將私隱專員所需的質素，以及為保障日後專員能夠充分獨立而設計的挑選架構和程序」都列入法例中。
呢三個標準都好合理，但蔣任宏符唔符合呢﹖佢做緊郵政署署長嗰陣，長沙灣郵局發生攝錄機監察員工工作一事，呢宗侵犯私隱嘅往績真係夠晒經典。至於背景，蔣任宏係退休後做監察機構負責人嘅前高官，退休高官俱樂部應該都有份嘅。個人質素就要等政府嘅遴選委員會，同政制及內地事務局局長林瑞麟出嚟交代至得。如果過唔到呢三關，點可以隨便做私隱專員個高職呀？
個人資料私隱公署過去曾經被轟大花筒等管治醜聞，前專員又是非多多，依家新專員啱啱上任就惹嚟各種質疑，可見香港人嘅私隱保護工作真係要有質素保證至得。