唔係靠嚇o架，近排網上熱播一段用化工原料混合成果汁嘅視頻，有人將喺廣州一個批發市場買番嚟嘅廉價香精、香料、色素等食用化工原料用水溝開，咁就變成各種賣相吸引嘅「果汁」，出售圖利，飲你唔死算你命大。

有人可能會問，呢單嘢發生喺廣州，又關香港事？本報記者去到視頻片段提到嘅批發市場睇過，呢類化工原料唔止賣畀內地同胞，亦有好多香港人幫襯，而且仲有送貨到港服務添。有店舖負責人話，熟客多數打電話落單，收到錢就發貨，一兩日之後就可以送到香港，內地付款香港提貨，「一條龍」服務，方便快捷，效率一流。

呢啲化工原料到港後，唔少流入成行成市嘅樓上cafe。幾滴「香油」，溝水加冰，咁就係一杯「鮮榨果汁」嘞。有樓上cafe老細承認，開張咁多年，賣嘅飲品全部冇果汁成分，問你服未。

「鮮榨果汁」冇水果成分都未算恐怖，至弊係隨時禍從口入。有專家話，呢啲化學物其實都係添加劑，飲品加咗人造色素之後繽紛誘人，但人體吸收咗生產過程殘留嘅有毒物質，隨時會中毒甚至生癌。

叮！依家樓上cafe愈開愈多，致癌果汁賣通街，消費者中晒招都唔知，講起真係不寒而慄。咦，食環署唔係有個食物安全中心嘅咩？唔通佢哋全部放緊暑假？

食環署話喎，食安中心每個月都公布食物監察結果，○九年初到今年六月抽取咗六百幾個冰飲品樣本，化學及微生物含量測試結果全部「滿意」。咁就奇嘞，致癌果汁喺本港賣咗咁多年，當局居然仲話滿意，諗落只有兩種可能，一係驗唔出，一係根本冇驗。

學者話，由於呢類「果汁」唔係預先包裝，毋須列明食物成分，建議食環署加強抽查。好明顯，致癌果汁無王管，原因係法例存在漏洞，當局把關不力，監管失職。

講開又講，幾年前消委會發現市面唔少聲稱有水果成分嘅餅乾同乳酪，查實只含水果味香精，根本冇水果成分，但包裝就印晒水果圖案。食物包裝誤導市民，食安中心除咗向生產商發幾封警告信，其他乜都冇做。

食環署得過且過，冇監冇管，搞到水果餅乾冇水果，鮮榨果汁冇果汁，靠呢個政府保障食物安全，遲早瓜得。叮！