本文重點
經過反高鐵同政改兩場「戰役」後，相信大家都見到「80後」嘅威力，各黨派亦紛紛向年輕人埋手，希望將佢哋嘅力量收為己用，同時為黨塑造年輕有活力嘅形象。好似白鴿黨咁，班立法會議員喺今個暑假會積極學電腦，希望拉近同新一代嘅距離，建制派亦唔執輸，好似近年積極吸納新血嘅工聯會亦都出招。
葉偉明潘佩璆唔落場藉口多
工聯會立法會議員葉偉明透露，工聯會十一月二十一號會喺機場範圍搞一場十公里長跑比賽，暫定預二千人參加，活動主要係為工聯會屬下嘅職安基金籌款，而路線暫時仲未落實，不過應該會喺東岸路至亞洲博覽館一帶。
呢次長跑由工聯會青年事務委員會、屬下民航工會同機管局合辦，由青委搞，對象好明顯就係年輕人啦！工聯會另一位立法會議員潘佩璆承認，佢哋一向都積極吸納年輕人，加上長跑運動咁健康，做多啲都冇壞喎。
呢邊話要吸納年輕人，但兩位議員竟然諸多藉口唔落場喎！潘佩璆話近兩年自己少咗鍛煉，所以唔會參加今次比賽，不過佢喺入立法會之前其實成日都練跑，仲年年參加馬拉松添。至於搞手之一嘅葉偉明就暫時未知落唔落場，佢近來積極減磅，如果到時成績理想的話，一定會身體力行支持。唔係呀？