一位喺元朗經營泰國菜館嘅小老闆，前排主動聯絡富貴黨主席劉健儀Miriam，話想傾吓最低工資嘅問題。於是前日Miriam就拉埋喺新界西積極做地區工作嘅常委田北辰，一齊同呢位老闆以及十幾位同一條街嘅小餐廳老闆坐低傾吓偈。

低過富貴黨調查$24時薪

席間幾間餐廳嘅老闆，除咗大鬧政府對最低工資法例嘅實施情況宣傳不足外，仲提到依家佢哋啲伙記嘅時薪大約廿蚊至廿二蚊，擔心一旦加到廿四至廿五蚊，佢哋就要減低伙記工時嚟維皮，若然加到廿八至廿九蚊的話，更加要裁減人手先掂。言下之意，即係廿蚊呢個水位先至唔會有影響啦！

記得最低工資立法之前，張宇人曾經心口掛住個勇字，大大聲出嚟話最低工資訂於廿蚊，先至對企業無咁大殺傷力。卒之激起公憤、全城圍插，被人封為「廿蚊張」兼掟廿蚊紙，連分屬黨友嘅Miriam都要出嚟同佢劃清界線，結果張宇人亦有向公眾道歉。

當時張宇人並冇喺席間，家陣啲小餐廳老闆出嚟話時薪廿蚊先掂，就好似撐「廿蚊張」，仲幫「廿蚊張」平反咁，若果張宇人聽到呢番說話，肯定開心到不得了。

但係，富貴黨早前透過民間調查機構得出嘅最低工資水平係廿四蚊，依家啲老闆比佢哋嘅水位更低，咁又會唔會影響到富貴黨再調低最低工資嘅水平，同意番「廿蚊張」呢？