據講政府好快就公布評核副局長同政治助理薪酬調整嘅中期報告。眾所周知，政府不嬲有官官相護嘅傳統，份報告係咪可以反映真實情況，實在值得懷疑。好彩群眾眼睛係雪亮嘅，傳媒同政黨近日紛紛公布民調結果，評核副局長同政治助理嘅表現，搞到班新貴有得震冇得瞓。

嗱，尋日又有政黨公布最新民調結果嘞，七成受訪者認為副局長同政治助理表現唔合格，以五分為滿分，一分最低，有四成人打一分。七成受訪者話，副局長同政助應該減薪。

另外，香港電台日前向立法會議員做問卷調查，請佢哋為副局長同政助評分。嘩，張成績表直情不忍卒睹，十八人當中只有兩人合格，過半數受訪議員認為大多數新貴都應該減薪。咁即係話，市民同議員都對新貴劣評如潮。寧犯天條，莫犯眾憎，唔怪之得佢哋塊面好似苦瓜乾咁款啦。

開講有話，種瓜得瓜，種豆得豆，呢班新貴今日淪為眾矢之的，完全係咎由自取。想當日，政府以擴大政治問責制為由建立呢支御林軍，一開始就係黑箱作業，連佢哋嘅人工都唔肯公開，更搞笑嘅係，多名新貴仲被踢爆持有外國護照，原來係一支八國聯軍。

雖然係咁，如果佢哋上任後生生性性做番啲實事，仲係可以得到市民認同嘅。可惜直到依家，多數市民仲認唔出副局長到底乜水打乜水，政治助理更加唔使講，簡直就係一班與世隔絕嘅宅男宅女。港大調查發現，九名副局長之中，有七人認知度係零，九名政治助理當中，亦有六名認知度係零。認知度低成咁，做嘅嘢多極都有限啦。叮！

但又唔係個個都默默無聞嘅，好似商務及經濟發展局副局長蘇錦樑就夠晒出名嘞，佢個菲傭去入境處申請續留香港，本應要出示入息證明，但係副局大人居然叫菲傭攞佢張名片去撻朵，點知畀傳媒踢爆，想唔臭名遠揚都難啦。

大家應該記得，政府當初宣布擴大問責團隊嘅時候講過，副局長要分擔局長工作，推動落實政策，但呢班新貴一係好似縮頭烏龜咁款，一係醜聞多籮籮，點面對傳媒同公眾呀？

叮佢個鎯鎯！政府每年花幾千萬公帑養一班庸才，簡直嘥米飯，梗係要減佢哋嘅人工啦。不過，計太一叮話齋，淨係減人工係唔夠嘅，政府亦唔使裝模作樣做乜嘢中期評核嘞，一於炒晒班庸才，一了百了罷啦。