匯賢智庫嘅陳岳鵬早前過檔特首辦做特別助理，辭咗南區薄扶林選區區議員席位，為填補空缺而需進行嘅補選聽日就截止報名，除咗匯賢智庫已派番個牛津尖子Ellis劉應東出戰，公文袋「老香港」司馬文尋日亦正式報名參選，同Ellis對撼。公文袋更幫司馬文造勢，搵嚟司馬文兩個囝囝撐場，黨內五個立法會議員同一眾核心人物都有出現。
喺荷蘭出世嘅司馬文今年五十二歲，人生有一半時間喺香港過，佢見傳媒時好強調自己喺香港住咗好多年，對呢個地方有感情，熟悉地區事務，有信心可以鍊贏Ellis咁話。不過，司馬文自爆自己廣東話認真麻麻，尋日佢九成時間講英文，咬字最正嘅廣東話係「大家好，我係司馬文」，其他就係話自己係香港地膽，喺香港留低好多腳毛之類嘅輕鬆說話，大部分都聽唔明佢噏乜。
司馬文話自己住喺香港二十六年，從來都冇真正的起心肝學廣東話，最大原因係佢發音太差，聽佢講廣東話嘅人都會係咁笑佢，搞到佢表達唔到自己嘅意思，所以索性講番英文喎。不過想做區議員，唔同香港人「同聲同氣」好難㗎喎！司馬文都明白呢個道理，話之後會苦練多啲喎！