政府早前搞政改起錨騷，一班行政會議成員做晒推銷爛頭蟀，其中阿Ron夏佳理、胡紅玉、「金刀梁」梁智鴻同張炳良，粉墨登場幫手拍宣傳短片，而阿Ron喺短片中有呢句壓軸對白：「為民主，你我一齊贏，起錨啦！」一齊贏？邊個話㗎？
港大民意研究計劃喺七月進行行會成員排名調查，發現對比三個月前，「五大」名單起咗大變化。從熟悉程度計，頭三位依次係CY梁振英、阿Ron同張炳，金刀梁同胡紅玉就首次上榜。咪以為「起錨成員」受惠起錨騷，再睇埋落去，原來係另一回事。
調查同時顯示，係民望方面，阿Ron、金刀梁、CY、胡紅玉同鄭耀棠係得分最高嘅行會成員，但除金刀梁同胡紅玉外，其餘三人得分全數顯著下跌，喺四十分至五十分之間浮沉。當中尤以阿Ron嘅評分跌幅最大，雖然佢喺民望評分保住榜首位置，但得分比起上次四月嘅調查急跌六點三分，低至四十八點八分「肥佬」水平，係佢○六年上榜以嚟嘅新低。
喺宣傳片引用「柴九」名句、反問若政制發展再原地踏步，香港仲有幾多個十年嘅張炳，民望評分跌得冇咁甘，但都下挫四分；鄭耀棠同CY亦分別下跌三點四分同二點六分，民望齊齊「拋錨」。
首次打入五大嘅金刀梁同胡紅玉得分都唔高，金刀梁攞四十七點二分，僅次於阿Ron；胡紅玉攞四十二點一分，僅僅高過攞四十一點八分嘅鄭耀棠。