吊頸都要抖吓氣，尋日下晝四點幾喺中環置地廣場對開，見到白鴿黨主席「鐵頭仁」何俊仁一支公企喺樹蔭下睇緊自己本著作《謙卑的奮鬥》。何解佢要睇番自己本書咁搞笑？原來佢約咗朋友飲茶，本書係送畀朋友嘅。

對於有指佢落咗「柯打」，唔畀白鴿黨核心成員八月離港放大假，鐵頭仁矢口否認，仲自爆過幾日佢都會同太太及一對夫妻朋友一齊去沖繩玩喎。佢話嗰邊環境舒服，抖暑一流，玩完返嚟等立法會復會。

另外，白鴿黨副主席劉慧卿早前揚言希望黨友可以喺考勤方面做好啲，唔好再遲到早退或無故甩底，不過佢就強調黨友出席泛民飯盒會完全冇問題，事關佢哋就算冇人去到，都會派職員去跟進，絕對唔會出現跟跟吓冇咗影嘅情況！