前日政府出咗四張訪問團訪港嘅相，相中所見，政制及內地事務局局長「林公公」林瑞麟同埋教育局局長「孫公」孫明揚都有份接待，附帶嘅資料只係知道訪問團團長叫做謝國樑，今次係為咗教育問題而嚟，孫公就向對方講解香港教育服務嘅最新情況，同埋傾吓兩地教育發展嘅協作事宜，真係再多啲料都冇。翻查資料，謝國樑係國民黨立委。

既然要促進港台關係，呢次有客嚟自番薯島（台灣島形狀似番薯）應該大事張揚先啱，咁點解訪問團嘅代表係乜嘢背景、行程、訪問團同政府會面仲傾過啲乜，全部都係一個問號呢？於是我哋前日就問政府，但到尋日先有回音。

教育局話冇出新聞稿，係因為孫公同訪問團嘅會面冇詳情之故，仲形容雙方純粹係資料性交流，訪問團表示過想睇香港嘅大學，教育局就提供聯絡方法畀對方，最後訪問團去過港大。

要客人自己聯絡港大

吓！訪問團千里迢迢嚟到，仲要自己聯絡港大？認真待慢晒！之後政制及內地事務局終於回覆訪問團成員嘅名，同埋交代對方尋日晏晝起程返台，而林公公就喺雙方會面時，講解一國兩制嘅落實情況等，算係聊勝於無。

其實自○八年貿易發展局喺台北開辦事處後，舊年台中市市長胡志強同台北市市長郝龍斌訪港，民政事務局局長曾德成、林公公同商務及經濟發展局局長劉吳惠蘭亦先後訪台，同埋今年三月，政府成立由行會成員李業廣做主席嘅港台經濟文化合作協進會，以及由全國政協委員李大壯做主席嘅香港—台灣商貿合作委員會，政府都會唱到街知巷聞。今次突然冷處理訪問團，仲搞到鬼鬼祟祟咁，為乜呢？好心就透明度高啲啦！