事關今年有十三萬人參加會考，而公營中六學位就唔夠三萬個，正所謂僧多粥少，無論燒幾多香，叩幾多頭，都有十萬人前路茫茫。往年問題仲冇咁大，最多咪重讀中五，第二年再搏過，但今年係末代會考，下學年全港官津及直資中學唔再開設舊制中五課程，會考生再冇重讀呢支歌仔唱。為人父母者，睇見咁嘅環境，唔緊張就假。

可惜你急政府唔急，教育局尋日話，升唔到預科，成績又唔算太差嘅會考生可以報讀新高中課程嘅高二，然後喺二○一二年參加新嘅中學文憑試，成績理想可以直升大學咁話。

聽起嚟都幾好噃，兩年後有機會升大學。之不過，如果你信晒佢哋就弊傢伙。其實，會考生「插班」讀新高中二年級，一啲都唔易，因為兩種學制課程差別好大，人哋讀咗成年，你先至插入去，咁容易跟得上咩？其他唔講，淨係嗰門通識課，就夠你煩嘞。所以，如果勉強安排會考生入讀新高二，唔單止學生本人辛苦，老師同學校都頭痕。

難怪好多學校都拚命減少招收外校中五生名額，仲起勢提高收生門檻，要求多多，又話要會考成績十四分以上，又話選科成績要Ｄ級或以上，仲要平時成績唔錯、讀書態度良好等等。講到尾，佢哋根本唔歡迎會考生插讀新高二。

中六升唔到，重讀又冇希望，會考生不知何去何從。有私校乘機出招，話會開設舊制中五課程，供會考失手嘅學生重讀喎。不過，正如有教育界人士話齋，重讀呢啲課程之後，又唔可以銜接預科，讀嚟做乜喎？講唔埋仲係陷阱，千祈咪踩隻腳落去呀。

咁即係話，會考生惟有報讀專業教育學院（IVE）嘞，聽講會有六萬人報讀，好多IVE分校吊起嚟賣，一早就放風話先到先註冊喎，搞到大批學生漏夜瞓街排隊。

話時話，今時今日末代會考生咁慘情，都係多得當局嘅所謂教育改革，一味閉門造車，嗱，如果佢哋唔係懵到上心口就唔會搞到咁惶恐，開始規劃高中轉制嘅時候，就應該諗到末代會考生嘅出路問題啦。講鬼咩，喺呢班庸官心目中，學生只係一群白老鼠咋，話之你流落街頭啦。卒之咪搞到會考生好似棄嬰咁款囉。叮！

所以，太一叮奉勸各位家長，如果唔想自己嘅細路瞓街，第日去文武廟一定要祈求文武二帝令班庸官快快收皮。叮佢個鎯鎯！