二十二歲的張子煬不是富二代，只是成長於中產家庭的「80後」，兩年前大專畢業就協助家族生意。他有個穩定的女朋友，生活無憂，無端端見到一班同輩激情反高鐵、反政改，搶閘成為「80後」代言人，令他很不甘心。七個月前，他毫不猶豫就加入政黨，投身社區，決心搶回「80後」的發言權，「我傾向用理性和平嘅方式，但唔表示唔會激，只不過我會比較有耐性，循序漸進！」

田北辰落區，子煬亦陪伴在側「學嘢」。

和街坊去旅行，子煬才發現香港旅遊勝地多多。

自由黨要走入社區，子煬義不容辭由零開始，郎情妾意一拍即合。誰知生活次序從此大亂，時間不夠用、無假期、無娛樂、無休息時間，甚至連女朋友都失去！「七個小時正常上班，一放工就落區，星期六、日搞活動排到密麻麻，根本再騰唔出時間做其他事！女朋友覺得我做啲嘢好無謂，好唔實際！」觀念不一致，分手收場！

不止女朋友，其實父母也覺得他有點不務正業，「佢哋認為我應該打好事業基礎，搵多啲錢。」失戀並不好受，父母的期望更是壓力，但子煬深信自己是對的，「從前我真係唔知道幫到人之後，所得到嘅滿足感咁大、咁快樂！」

人與人愈來愈疏離，鄰里關係也差，香港其實已經生病！「社會發生咁多倫常慘案，都係啲人將唔開心嘅事收收埋埋，唔畀機會人哋幫佢分擔！結果死結愈結愈實，變成悲劇！」子煬年紀輕輕，只做了幾個月社區幹事，就深深意識到落區工作的重要意義，「解決問題總要有人主動，佢哋有困難唔肯走出嚟，我哋可以走前一步去幫佢。」

落區搞活動，將關在屋子裏面的人拉出社區，夾手夾腳爭取權益，解決困難。「呢種感覺好奇妙！」子煬愈來愈愛這工作，內心的那團火，已經燃起，「社會太多問題，太多人需要幫忙，尤其係弱勢社群！我已經有種欲罷不能嘅感覺！」

張子煬小檔案

年齡：22

感情狀況：單身

工作：自由黨新界西地區幹事

學歷：香港大學專業進修學院

興趣：電影、時事、旅行