新界鄉議局主席劉皇發同「機器大王」蔣震個女阿Ann蔣麗芸好老友，佢哋幾乎年年都會舉家把臂外遊，下星期佢哋又組咗一個團員包括中、港、台政商界人士嘅豪華旅行團，去歐洲勁玩兩星期，未計機票嘅旅費已經要三、四萬元。
阿Ann同發叔咁熟落，原來緣於大家一齊出任全國政協十幾年，所以差唔多年年都會號召兩家人組團共享家庭樂，今次阿Ann嘅老公梁海明同爸爸蔣震都會同行。阿Ann話二十幾位團員之中，唔止有香港人，仲有台灣人、內地人同埋外國人添！
佢哋搵旅行社設計咗個老少咸宜嘅行程，包括去捷克最迷人嘅布拉格，又去東德參觀集中營，跟住上郵輪暢遊多瑙河，途經奧地利、匈牙利嘅布達佩斯等。阿Ann話，最期待去布拉格古城探密，見識吓已故大文豪卡夫卡嘅舊居喎！