見習律師都有最低工資？律師會尋日向會員發出指引，規定所有會員聘用見習律師首年月薪唔可以少過九千蚊，第二年唔可以少過一萬蚊。見習律師嘅最低工資突然有得加，唔通同近日立法會通過《最低工資條例草案》有關？律師會會長王桂壎解釋話唔關事，因為大部分會員請見習律師都唔止出呢個價，今次只不過係例行檢討啫。
王桂壎尋日話，對上一次檢討見習律師嘅工資下限，大概係四年前嘅事，律師會一向會參考市場水平，制訂見習律師嘅最低工資，上一個薪酬水平係首年七千元、第二年八千元，即係話律師嘅最低工資，今年加近二成九。佢不忘賣花讚花香，話律師會呢個最低工資規定已有十幾廿年歷史，可以話係高瞻遠矚喎！
呢排王桂壎日日朝八晚六上一個澳洲大學辦嘅調解課程，課程共五日，足足要讀四十粒鐘。原來佢想以身作則話畀其他會員聽，要不時進修，與時並進。
雖然法例冇規定要上呢類課程先可以做調解工作，但佢話吸收一下外國經驗點都係好事。至於接少咗幾多case，佢話做得會長已經冇咗好多時間喇，呢啲就更加冇得計喎！