前綫同白鴿黨合併後，一向重視紀律嘅劉慧卿就擔當咗司徒華當年嘅黨鞭角色，重整白鴿黨嘅散漫黨紀，豈料兩年唔到，白鴿仔故態復萌，且懶蛇新招層出不窮。卿姐尋日就頗為勞氣咁話白鴿黨想提高黨效能，先要執靚考勤情況，平日黨員參加活動，好似示威遊行，又或者黨友相約碰頭傾談，成日有人遲到早退，甚至缺席，要花人力物力三催四請，咁點做嘢呢？
卿姐仲踢爆有人代表白鴿黨參加星期五泛民飯盒會，一係遲到，一係冇到，一係應承將會上問題帶回去諮詢黨友，最後竟然影都冇。佢唔想開名逐個數邊個違紀違規，叫傳媒自己打聽，肯定俯拾皆是。白鴿仔咁Hea嘅心態從政，點樣提升黨務效能，睇怕卿姐要再密啲手去捉蛇嘞！
白鴿黨嘅立法會議員張文光坦白招供，佢係卿姐口中嘅違紀黨員。上星期六，張文同卿姐約咗鄉議局成員開會，點知當日原來張文屋企搬屋，「老婆叫到，唔搬想死咩」？張文於是甩底，事後畀卿姐省咗三次。
另外，有「李漢奸」稱號嘅白鴿黨創黨主席李柱銘早前因不滿黨支持政改方案而揚言考慮退黨，但考慮咗個幾月仲未考慮完，唔知要扭擰到幾時，卿姐相信佢最終都唔係退黨居多。