中華廠商聯合會近年力求年輕化，連「會呔」都嚟個大變身。副會長施榮懷早前喺銅鑼灣食飯就率先展示新呔，粉紅底色配上廠商會Logo，感覺煥然一新。佢話條呔只賣一百蚊，但質料媲美國際大品牌。
廠商會早年沿用紅、藍兩色會呔，設計平實，會長黃友嘉上任後，覺得變革吓fresh好多，於是搵嚟常務會董方平幫手做新會呔，一齊精心挑選紅、黃、粉藍及粉紅做四種主色，再分別配上廠商會「孖圈」標記，簡潔又大方。
方平搞慣紡織，生產領呔駕輕就熟，廠商會批新呔由佢負責製造，一口氣生產咗千二條，每隻色有三百條。為免女會員投訴被冷落，施榮懷提議造多一百條黃、藍兩色新絲巾。新呔近月面世，方平自掏腰包向九十六位會董送上其中兩款呔，廠商會就送埋餘下兩款，即係話，會董們有齊「四色呔」，天天新款話咁易。