富貴黨成班高層同十幾位黨友尋晚富臨飯店設宴，慶祝三位今年獲頒銅紫荊星章同埋獲委任做太平紳士嘅黨友。難得咁高興，遲到嘅富貴黨副主席張宇人好識做，萬歲咗四支紅酒同黨友暢飲。
雖然只係筵開兩席，人唔算多，但勝在夠親密。獲頒銅紫荊星章嘅東華三院前主席李三元，同埋中西區區議員李應生心情勁靚，笑到見牙唔見眼，李三元仲話冇禮物唔緊要，有心就得㗎啦！至於獲委任做太平紳士嘅陳遠華就一早到場，隨後仲同黨主席劉健儀、常委田北辰、李應生同李三元一齊合照。
難得去富臨慶祝，梗係要食「阿一鮑魚」喇！但
到菜單上一味鮑參翅肚都冇，較為近磅嘅只係花蟹肉翅裙冬瓜盅，同埋燒雲腿油泡肚尖。原來張菜單係富貴黨特別整嘅，講明唔要鮑參翅肚，但點咗佢哋食開嘅富臨脆皮雞同燒汁焗牛尾，埋單大約一萬蚊左右，即係五百蚊位。其實佢哋都係旨在一齊聚餐，食得豪唔豪都唔係最重要嘅。