潘潔張文韜包尾

其實，過往好多民調結果都反映副局政助嘅認知度低，有啲仲低至近乎零。有電台尋日就公布有關立法會議員對副局同政助嘅考核調查，結果又係慘不忍睹，副局同政助之中，各只一人合格，其餘全部「肥佬」，其中尤以被公文袋黨魁余若薇批評態度差嘅環境局副局長潘潔，同埋甚少喺立法會露面嘅發展局政治助理張文韜評分包尾，「肥佬」不特止，直情變咗「黑豬」。

個調查以十分為滿分，五分合格，根據所收番嘅二十二份議員回應評分，九名副局同九名政助，竟然各只得一人合格，佢哋就係食物及衞生局副局長梁卓偉同勞工及福利局政助莫宜端。梁卓偉係十八名政治新丁中得分最高嘅，但都係只得六點五啫，得分第二高嘅莫宜端，更只有五點二分，其他十六人得分之低可想而知。

九名副局之中，以潘潔最低分，只有二點九四分，尾二嗰個係曾爆出「卡片風波」嘅商務及經濟發展局副局長蘇錦樑，新加盟嘅政制及內地事務局副局長黃靜文協助推銷完政改大戰，亦只有三點九四分，排尾三。至於班政助，更有五人低過三分，張文韜以二點二六分包尾，亦係十八個政治新丁中嘅最低分，排尾二嘅係民政事務局政助徐英偉，得二點三五分；而財經事務及庫務局政助「坡妹」伍潔鏇亦只有二點四二分，一句講晒：水鬥水。唉，呢班政治新丁咁嘅表現，納稅人啲錢真係使得唔抵囉。

所以，調查亦顯示，十八個副局政助中，十四人被過半數受訪議員要求減薪，三人被要求凍薪，只有梁卓偉一人獲建議加人工。副局人工介乎十九萬至二十一萬元，政助由十二萬至十五萬元不等，如果以呢份調查結果評核，減佢哋三成人工，都畀高咗喇！