冇錯，家陣絕大部分打工仔都係「多勞少得」，捱緊騾仔，咁係因為條命生得唔夠正，同筍工絕緣啫。如果咁好彩成為消防處特遣執法隊一員，恭喜晒，因為呢份工真係筍到痹，筍到冇朋友。

呢嗱，上晝十點幾開工，喺要巡查嘅大廈逗留一粒鐘之後離開，跟住各自各精彩，有人先去剪個靚髮，再去銀行櫃員機攞錢，然後搵間茶餐廳醫肚；亦有人似乎得閒過頭，精力過剩，行去附近泳池暢泳，游足一粒鐘至返辦事處。

計太一叮話齋，特遣執法隊應該叫「奉旨蛇王隊」更符合佢哋嘅「工作性質」。嗱，近年本港多次發生涉及商住樓宇嘅大火，唔止造成市民傷亡，更有多名消防員殉職。全港商住樓宇無數，而且大部分樓齡偏高，照計，專責巡查商住樓宇消防安全嘅特遣隊，應該周身唔得閒至啱吖。

叮！實情根本唔係呢回事。消防處處長盧振雄早前透露，呢支十四人嘅特遣隊過去一年巡查過百幾幢樓宇。咦，橫計掂計，平均每人每月只查一幢樓咁大把。

剪髮、食晏、游水，全部都同消防無關，特遣隊人員開工時間用個幾鐘處理私人事務，仲長過巡查樓宇嘅時間，唔知咁算唔算不務正業呢？申訴專員曾批評消防處巡查龜速，要四十年至可以查晒全港二萬二千幾間食肆。消防處咁蛇王吞泡法，巡足八十年都未必搞得掂。

消防處發言人尋日回應，不過又係例牌菜一碟，話要進一步了解，如有違規將嚴肅處理。又話員工喺街外執勤，有一套既定程序要遵守喎。

叮！嗱嗱嗱，問題就喺呢度嘞。冇人會懷疑消防處有套相應嘅程序，員工有規不循，當程序冇到，固然有問題；但管理層長期以來對違規行為放任自流，更難辭其咎。

「管理落後、把關不嚴」，審計署早已經敲響警鐘。近年消防處多次被踢爆紀律廢弛，好似當值飲酒、喺消防局開派對等等，但消防處依然係批評接受，一切照舊，紀律愈來愈鬆散，醜聞愈爆愈離譜。

值得關注嘅係，開工吞泡唔單止影響咗消防處嘅形象，令市民失晒信心，更惹起同袍強烈不滿，認為特遣隊每周只開五日工，唔使輪更，唔使通宵候命，咁嘅筍工都仲蛇王，實在過分。

專責防火嘅特遣隊變成「惹火尤物」，搞到消防處內部矛盾激化，士氣渙散，火燒後欄。如果當局繼續姑息，有程序冇監管，呢把火遲早連禮賓府都燒通頂。叮！