早前立法會議員霍震霆三仔霍啟人涉嫌酒後駕駛撞車，仲賣晒報紙，爸爸霍公子同前港姐冠軍媽咪朱玲玲擔心之餘，仲尷尬不已。下月中要返警署報到嘅啟人仍然留港放暑假，未知係咪受官司影響，啟人顯得悶悶不樂，日前更飛甩如糖黐豆嘅女友，改陪爸爸去中環歎下午茶。
嗰陣係晏晝五點半，兩仔爺打對面坐，睇嚟佢哋冇乜胃口，霍公子柯打咗杯消暑西瓜汁，啟人就叫咗杯凍朱古力，兩仔爺邊歎茶邊閒話家常，氣氛輕鬆，但啟人似乎有心事，不時托頭沉思，做爸爸嘅惟有開解佢。
飲咗半粒鐘，霍公子叫埋單，啟人見記者上前打招呼，顯得錯愕，但仍面帶笑容。講起涉嫌醉駕單案件進展成點，佢尷尬咁笑一笑，唔願多講。咁媽咪有冇大發雷霆呢？啟人話：「阿媽冇鬧，亦冇唔准我揸車。」問霍公子會唔會提醒阿仔以後小心揸車，佢瞄咗啟人一眼，報以一笑，好有默契，似乎對阿仔仍然相當信任。