雖然醫管局行政總裁蘇利民即將離任，但仍然積極出席各項醫學界活動。尋日朝早，佢出席香港移植運動協會祝捷會時，突然自爆係佢生日，全場即時起哄唱生日歌為佢慶祝，搞到蘇利民面都紅埋。佢事後就話雖然一開始覺得好尷尬，但咁多人一齊祝福佢真係好感動！
原來尋日係蘇利民五十四歲生日，佢喺活動開始時就自爆太太朝早打電話畀佢，問佢生日會做啲乜嘢？佢照直講話會出席活動。太太好驚訝：「禮拜日喎！你生日喎！都要去？」佢就話今次係佢最後一次機會喺香港出席移植運動協會活動，所以生日都要嚟。佢呢番話氹得全場人士好開心，即時全場唱英文版本嘅生日歌，之後又有中文版，嗰時佢塊面紅晒，活動司儀仲講笑咁話一早準備好茶點可以當係幫佢開生日會喎！
蘇利民話佢喺活動中都簽咗器官捐贈卡，而同場嘅全國人大常委范徐麗泰話，佢喺一九八五年已經簽咗器官捐贈卡。世事難料，後來佢捐咗個腎畀囡囡范凌華。