新一屆嘅香港小姐尋晚新鮮出爐,廠商會嘅立法會代表林大輝有份做評判,攞正牌靚女,羨煞旁人!但大輝始終係公眾人物,喺鏡頭前對成班衣着性感嘅靚女評頭品足,會唔會有心理壓力呢?大輝聞言一派自在咁話,佢做時裝出身,女有晒經驗㗎喇!
大輝做過製衣廠嘅高層,佢話當時經常出任各類時裝表演節目嘅評判,一早見慣呢啲場面。佢話女模特兒着得好少布,有時甚至着住成件透視裝都有,所以佢女好在行,今次對佢嚟講根本冇難度。呵!原來佢女有前科,早就見慣晒。
正所謂各花入各眼,喺大輝心目中,今屆邊位佳麗係佢心水呢?佢唔肯透露。咁又係嘅,話晒佢係評判,咁早講容乜易畀人質疑佢畀分有偏頗㗎!
但佢話香港小姐美貌同智慧並重係最基本要求,身為政治人物,佢認為港姐要兼備香港嘅特徵,包括認識香港、對香港有感情。佢話,如果唔係,選出嚟嘅靚女同新加坡或者泰國小姐有乜嘢唔同?