由林健鋒、梁君彥、梁劉柔芬及劉皇發組成嘅經濟動力（4L），同由石禮謙、何鍾泰、劉秀成及梁美芬組成嘅專業會議（4P），皆屬建制派新興力量，理念相當接近，都係同政府關係友好，兩個政團各喺立法會手握四票，若能結盟，實力不容忽視。所以，今年初兩黨忽然「撻着」，愈行愈埋，但喺消息曝光後，有人猜疑對方向傳媒放風，心雄想爭坐老大位置，雙方頓生芥蒂，地下情幻滅後，雙方鬥氣時有所聞。
好似林健鋒競逐政改方案嘅小組委員會副主席，建制派有三人倒戈投票畀白鴿黨劉慧卿，雖然林健鋒最終都當選，但亦惹起內鬼疑雲，其中兩名疑似倒戈者正係何鍾泰同劉秀成。之後，4L搞工商政改論壇，4P又全部玩失蹤。正當大家諗住兩個政團再冇偈傾之際，雙方突然又修好！
據聞，兩個政團早前已食咗一餐和頭酒，席間雙方都客客氣氣，表明過咗去嘅當粉筆字抹咗佢，無謂計較，以後合作愉快！即係話，4L同4P唔止冰釋前嫌，未來兩年更加會有新嘅合作計劃。
從政治現實角度嚟諗，雙方冰釋前嫌，肯定各有盤算。喺兩年前退出富貴黨另起爐灶嘅4L，目前部署進軍下年區議會選舉同後年立法會選舉，呢個時候與同商界及專業界關係唔錯嘅4P再議結盟，就可以喺立法會內將主要對手富貴黨邊緣化；4P係新組合，自然想喺議會內多個朋友、少個敵人，有利保持影響力，於是造就兩黨又愈行愈近。