因政改立場現分歧而退出白鴿黨嘅立法會議員鄭家富，當大家以為一切已成定局之際，點知事隔一個月，白鴿黨嘅大埔工作隊竟然寄出一份仍然有阿富張相嘅工作匯報畀當區居民。阿富點解同白鴿黨欲斷難斷呢？
聽白鴿黨嘅大埔區議員區鎮樺講，原來呢批新嘅宣傳單張早喺六月時經已落咗「柯打」，仲印咗成幾萬張，當大家喺六月尾知道阿富決定退黨，都唔知點收科，仲諗緊應該用貼紙遮住阿富定個白鴿logo好。不過阿富就唔想嘥資源，話唔介意佢哋照派單張，但就講明希望佢哋快啲手喺七月底派晒佢，費事令市民誤會喎。
雖然佢哋已經諗盡辦法快啲派晒啲單張，但派極都仲有幾千張，睇嚟要甩手都冇咁易噃！