有「潮州之寶」之稱嘅國學大師饒宗頤今日九十五歲舊曆生日，潮州市委、市人民政府尋日專誠喺上環嘅潮州會館搞慶壽宴向饒公祝壽，潮屬社團總會創會主席陳偉南、主席許學之、發展委員會主席莊學山、潮州商會常務會董高永文醫生等都有出席，而饒公兩位千金清綺同清芬、二女婿鄧偉雄亦有出席，外孫女張圓瑛仲特登喺外國返嚟同公公賀壽。
老如松柏嘅饒公相當幽默，佢話自己個名嘅「頤」字代表面珠，叫大家嚟壽宴一定要大快朵頤。講到健康之道，佢話規律嘅生活對身體相當重要，佢每晚臨瞓前都會為自己按摩，搓搓手捽捽腳，最緊要記得郁動吓兩邊肩膀。
雖然只係簡單嘅保健動作，但對血氣運行好有幫助，難怪高醫生話同饒公握手問好時，畀饒公剛勁有力嘅手握到有啲痛。高醫生話佢當年因為要出席一個有唔少潮州人嘅慈善活動，為咗字正腔圓咁讀出各人名字，事先去咗請教饒公，因而結緣。
嚟緊八月八號，饒公會去敦煌出席由五百位嚟自世界各地嘅名人學者為佢搞嘅盛大露天生日會，之後仲會喺敦煌出席兩日學術論壇。