早喺政改通過後，白鴿黨隨即建議政府放寬超級區會議席嘅參選資格，令前任區議員以及同區會有緊密聯繫嘅人士都可以出選，理由係可以增加民主成分喎，一派冠冕堂皇，但講到尾白鴿黨都係為自己，旨在令以前做過區議員嘅白鴿仔單仲偕同狄志遠唔使再選區會，就可以自動有資格參選玩埋一份啫。點知建議一出，即畀政制及內地事務局局長「林公公」林瑞麟大潑冷水，話咁樣有違功能組別嘅定義，難以接受，令白鴿黨嘅如意算盤打唔響。

難一次過廢除委任區議員

更甚嘅係，早喺政改爭論期間，政府一直都話會積極考慮一次過廢除委任區議員，以回應白鴿黨同民協嘅合理期望。但據悉，白鴿黨極有可能會食多次詐胡，事關政府認為現時嘅委任區議員喺各區會都擔當相當多嘅職務，唔少仲要係委員會主席，若一刀切取消晒所有委任議員，無形中等如將佢哋嘅職務攤分畀其他民選區議員承擔，民選議員根本吃不消，具體操作出現極大困難；即使分兩屆取消委任制，喺明年將委任區議員人數減半，對現任民選區議員嘅影響亦好大，所以最後好有可能會分三次取消。

白鴿黨當初一廂情願轉軚支持方案，諗住可以掠番啲油水，點知原來政府一再咁請佢哋食白果，真係蝕晒底！