統計處推算，三十年後全港六十五歲或以上人口嘅比例，會激增到佔總人口二成八，換句話講，到時超過四分一人係長者。話就話長壽是福，但如果港府繼續齋噏唔做嘢，通街公公婆婆孤苦伶仃，無依無靠，咁就絕對唔係福，而係禍喇。

點樣解決人口老化問題？統計處處長馮興宏有條好橋，佢話喎，人口老化未必帶來社會負擔，可以研究將退休年齡延長至六十五歲，咁就可以多一成幾人力供應囉。

查實，延遲退休唔係乜嘢新招，好多地方早就已經實行緊。人口老化問題出現得更早、更嚴重嘅日本，幾年前已經推行；法國較早前亦通過一項法案，逐步將退休年齡由六十歲延長至六十二歲；德國仲犀利，打算十幾年內將法定退休年齡調高到六十七歲添。不過咁，延遲退休係冇辦法之中嘅辦法，只能治標不能治本。

本來，鼓勵生育係解決人口老化問題嘅不二法門，弊在呢招喺香港根本行唔通。港府鼓勵市民「最好生三個」，但係連提高供養子女免稅額都要扭扭擰擰，邊個夠膽生吖？

鼓勵生育行唔通，人口老化避無可避，於是乎，安老政策就最關鍵嘞。可惜講到安老，又係把幾火！港府口爽荷包立，資源永遠跟唔上社會實際需要。安老、護老宿位長期供不應求，輪候期間過身嘅長者年年都有幾千個。仲有吖，當局推行所謂「居家安老」，只不過係推卸責任，叫老人家自生自滅，搞到接連有長者喺屋企死咗都冇人知，你話幾悲哀吖。

人口老化迫在眉睫，延遲退休年齡不過係權宜之計，點樣保障長者退休後能夠無憂無慮生活至係關鍵。多年來，各界要求港府設立全民退休保障計劃聲音不絕，但當局借咗聾耳陳隻耳，拖得就拖。

冇錯，香港話就話有強積金制度，但不倫不類，供款有限，行政費用就去咗一大橛，講句唔好聽，港府似幫投資基金拉生意多過幫打工仔未雨綢繆；最大嘅問題係，低收入人士退休後強積金得雞碎咁多，買鹽都唔鹹，點樣養老吖？

講開又講，延遲退休呢家嘢，唔使高官教路，好多老人家早就做緊啦。呢，年過八十仲要揸小巴搵食，卒之焗死喺車廂內，咪就係典型囉。

計太一叮話齋，公務員就話有退休保障，衣食無憂啫，但好多長者臨老唔過得世，係時候考慮設立全民退休保障計劃啦。