隨着八達通以市民個人資料圖利事件愈揭愈深，好多港人對推銷電話戒心亦大咗，工聯會立法會議員黃國健（KK）話，佢對呢啲電話又愛又恨，愛嘅係自己個乖仔都喺澳洲做緊類似嘅工作，恨嘅當然就係類似八達通呢一類出賣個人資料嘅行為啦。
KK個仔舊年先喺澳洲大學畢業，依家喺當地市場調查機構做嘢，不時都要隨機Cold Call唔同嘅人。自從個仔做咗呢份工之後，佢同太太收到推銷或者市場調查電話，都會即時諗起個仔工作點辛苦，即時會客氣好多，唔會鬧人或者大力冚線。
本港嘅市場調查機構多採用佣金制，做到生意先分到錢，KK話澳洲嘅電話推銷員就有固定月薪，個仔嘅工作相對較穩定。而且澳洲嗰邊生活節奏冇香港咁快，啲外國人用成十分鐘做問卷都唔會介意。