本文重點
生活繁忙搞到唔少父母同仔女關係疏離，教育局副局長陳維安（Kenneth）尋日出席個活動時，講到佢嘅親子經驗，佢透露自己工作忙，陪兩個仔嘅時間愈嚟愈少，有次勉強陪細仔睇紀錄片，竟然睇到呼呼大睡，去咗搵周公，事後細仔寫咗張紙仔畀佢，令佢既感動又慚愧。
細仔留字條示體諒
Kenneth兩個仔今年分別九歲同十二歲，由於佢好忙，大仔不時用電郵問吓佢嘅工作情況，有次佢放工返屋企，本來已經覺得好攰，但個細仔想一齊睇二次大戰嘅黑白紀錄片，佢唔想個仔唔開心，即使好攰都應承佢，點知睇睇吓，佢竟然瞓着咗。
瞓醒之後，Kenneth見到個仔寫咗張紙仔畀佢，內容話知道佢好攰，不如下次先睇啦。Kenneth事後畀張紙老婆睇，老婆提醒佢要留起張紙，第時可以回味！其實，使乜第時回味呀，Kenneth依家都好難忘，亦從中悟到親子嘅方式，只要你願意投入，做得唔好仔女都會明白㗎。