上任首月有運行

沈校長話，校長工作充滿挑戰，未來會保持親民形象，同師生加強溝通。不過，畀人問到點解決新民主女神像擺放中大嘅事，佢就急急腳走咗去，似乎唔想回應呢個棘手問題，唔通想延續上任首月嘅「平安大吉」運氣？

沈校長話，校長工作好有挑戰性，履新以嚟，多咗機會同學生、學生會同教職員溝通，咁樣有助彼此促進信任同了解。至於未來嘅挑戰，沈校長就話，中大將來發展時需要資源，言下之意係將要面對籌款嘅問題；同時，本港好快落實三三四新學制，中大將會多咗好多學生，可能會帶嚟宿位嘅壓力。佢未上任時，外間已經關注佢嘅籌款能力，佢尋日主動提及，可見沈校長都有心理壓力。

講番尋日嘅畢業禮，沈校長表現輕鬆，親手頒獎畀兩位中大「出產」嘅傑出督察同警員，其中一個仲係逸夫書院畢業生，曾經擔任逸夫書院院長嘅沈校長開心到好似自己得獎咁。