中華總商會日前會慶，六個中國太空人專程訪港到賀，之後神舟六子更帶埋親眷到有「領呔大王」之稱嘅前全國人大常委曾憲梓屋企作客。曾老五年嚟捐出二千五百萬元人民幣支持中國航天事業，太空人難得訪港，所以上門拜訪以示謝意。呢一晚，曾老喺九龍塘嘅豪宅筵開七席，仲以客家菜宴客。
曾家總動員款客，大仔智謀、次子智雄同細仔智明齊齊喺度招呼貴客，智明太太黎瑞恩就負責打點菜式，席上名人仲有「福建幫頭領」楊孫西、廣東社團總會主席王國強、「新金王」黃英豪等，曾老興致勃勃，開席前攞起支咪，高歌一曲《沒有共產黨就沒有新中國》。
當晚賓客中，「太空人二代」同太太都有份，楊利偉囝囝楊寧康同其餘五位太空人嘅仔女都同媽咪坐埋一圍。今年十五歲嘅寧康，同爸爸成個餅印咁，佢嘅膽識不遜於爸爸，坦言香港充滿挑戰，有挑戰至有機會，佢都願意喺香港生活。太空人費俊龍公子費迪原來已經十八歲，暑假過後，將離開北京去南京讀大學。日前佢哋一行去迪士尼樂園，費迪第一次去，一睇見卡通人物嘅水花巡遊表演就好雀躍！
曾老前日專程喺客家梅州速遞幾味特色客家菜宴客，包括「鹽焗雞」、「客家釀豆腐」、「梅菜扣肉」同「酵粄」，仲有用魚蛋、豬肉丸及牛丸炮製成嘅「三色丸」，太空人試過都舔舔脷。