前社會福利署署長「阿魚」余志穩退休快將一年,最近有新動向,就係加盟協助少數族裔人士嘅融樂會做執委。阿魚話佢呢個位只係做義工,職責之一係幫手做演講,好似警察學校或者教育學院邀請融樂會去演講,佢就代表個會去,有需要的話,佢仲可以幫融樂會籌款添!
呢個會喺○一年成立,宗旨係協助少數族裔,多年嚟都同政府不斷周旋,試過揚言用人權法告政府嚟「大」教統局官員;○六年政府為種族歧視立法,佢哋就大鬧條例保障少少、豁免多多。問到阿魚會唔會掉轉槍頭,同政府對着幹,阿魚一笑置之,只係話相信政府做嘢會持平,對於佢自己點樣自處,佢就冇講到嘞。
記得阿魚○二年至○六年做民政事務局副秘書長時,政府正準備緊為種族歧視立法,同唔少少數族裔嘅香港人有接觸。當時佢係高官,依家就代表融樂會,角色唔同咗,唔知阿魚會唔會有所改變呢?