蘋果近期相繼推出iPad同iPhone4，好多人爭搶「潮機」，經濟動力梁君彥（Andrew）買咗iPad，但就無意買iPhone，佢話iPad可以下載立法會文件搭車時睇。前日晏晝食完午飯，我哋就撞見Andrew喺立法會停車場嘅座駕上睇iPad睇得好入神，原來係睇緊當日嘅新聞報道，仲有呀，佢瀏覽器嘅書籤早就入咗東方報業集團網站《on.cc》！
Andrew上禮拜買咗呢部iPad，依家已經上晒手，佢話呢部機好方便，家吓開會一機搞掂晒。咁點解唔考慮iPhone4呢？Andrew搖搖頭話唔會喇，仲自嘲係「打出打入一族」，既唔用手機拍片，多媒體手機功能亦懶得掂，即使有部iPhone4在手，都係用唔着啲功能喎，所以依家隨身有部iPhone3GS同iPad已經夠晒。
至於用舊咗嘅手機，Andrew堅持唔賣，原來係擔心手機內嘅電話號碼同資料被刪除後，仍然有機會被還原，賣出街分分鐘出事，所以佢屋企收埋好幾個舊電話喺櫃桶底。