高官紛送仔女外國留學

Jeremy尋日出席一個電台節目，透露今年會考生共有十二萬幾人，有意繼續學業嘅學生卻同往年一樣，唔超過八至九萬人；依家全港預科學額有近三萬個，另有新高中課程嘅中五學位，按照往年嘅經驗，重讀中五嘅需求每年唔超過九千人，佢跟住數埋副學士先修課程、IVE，甚至毅進同展翅，強調呢啲學額加起上嚟一定比應屆會考生多，佢哋根本唔使擔心冇書讀。

聽落好似幾樂觀，不過佢堆數字嘅背後卻有呃人之嫌，事關應屆會考生最擔心係一旦失手冇得重讀原本學制嘅中五，轉制讀新高中中五必須從頭學習新課程；至於IVE，早前先爆出學生為咗爭IVE學額而瞓街輪候嘅新聞，會考放榜後實打崩頭都似；毅進同展翅課程就傾向職業導向，唔啱嗰啲希望繼續讀書嘅學生；副學士先修課程雖然係選擇，但有幾多學生花得起嗰筆巨額學費呢？講嚟講去，教育局根本冇為末代會考生提供乜嘢特別出路。

所以Jeremy講完之後，學生依然全無信心。參加同一節目嘅末代會考生除咗關注新高中學制嘅銜接外，更話本港嘅學制係入到大學先係英雄，但大學學額少，負責教育嘅高官又紛紛將仔女送去外國讀書，用腳對本港教育制度投不信任票。呢個問題咁棘手，Jeremy都不禁呆咗吓。佢個BB得幾個月大，暫時都唔會送去外國讀書嘅，但好多政府高官嘅仔女都喺外國讀書，佢想撐都唔容易，惟有唔回應好過。