31/07/2010

播放本新聞相關短片

西隧話加就加 港府淪為廢柴

西隧又加價?係呀,又加價喇,今次已經係西隧兩年來第二次加價,而且加幅唔小o架,平均加百分之九,私家車、的士同埋貨車要多畀五元隧道費,的士加幅最高,有一成三咁多,簡直係按住搶,問你怕未!

香港人呢幾年真係談加價色變,事關每次公共事業機構加價都係牽一髮動全身,你加佢又加,大家都唔執輸,例如隧道加價,公共交通工具例牌食住上。呢,話口未完,九巴同龍運巴士果然亦申請加價喇,加幅分別高達百分之八點六同七點四,每程平均要多付五毫二至八毫半。九巴兩年前已加過一次價,市民仲未抖順條氣,咁快又要被劏多一次,唉,唔通真係肉隨砧板上,只能任人宰割?

講番西隧,今次加價唔單止加重市民負擔,加劇通脹,仲隨時影響整體交通添。眾所周知,三條過海行車隧道嘅車流量不嬲都唔平均,紅隧由朝塞到晚,西隧及東隧就車流稀疏。尤其係收費最貴嘅西隧,本來已經門庭冷落,加一次價,車流量就少啲,再加一次價,車流量又少啲,早已形成惡性循環,今次西隧又飛擒大咬,唔使問阿貴,車流量肯定又係大減。唔怪得有人話,西隧加價其實係損人不利己,諗落又幾有道理。

隧道加價好似無王管咁,想幾時加就幾時加,想加幾多就加幾多,講來講去都係港府無能所致。對於西隧今次加價,運輸及房屋局發言人話喎,政府一直不斷要求西隧公司喺制訂收費策略時,充分考慮公眾嘅承擔能力同接受程度。叮,又係講咗等於冇講,鬼唔知阿媽係女人咩,如果西隧真係充分考慮公眾嘅承擔能力同接受程度,就唔會頻頻加價喇!

講起真係把幾火,港府年前煞有介事委託顧問公司進行所謂隧道分流研究,本來話今年第二季有研究報告,點知到依家仲係無影無蹤。不過咁,雖然報告仲未出爐,但有消息透露,顧問公司將提出多項降低紅隧車流量嘅建議,包括調高貨車收費、利用選擇性加費紓緩塞車等等。你話喇,咁係咪添煩添亂呀,當局唔諗辦法降低西隧及東隧收費,吸引更多車輛使用,紓緩紅隧壓力,反而本末倒置,建議提高紅隧收費,簡直豈有此理。

其實使乜委託顧問公司研究吖,要解決過海隧道車流量唔平均話都冇咁易喇,各界一早就建議當局考慮回購東、西兩條隧道嘅經營權,然後統一制訂三條隧道嘅收費標準,咁就搞掂喇。如果港府官員腦閉塞唔知點做,咪參考吓其他地方嘅經驗囉,例如南京長江隧道建成後,亦出現過收費爭議,後來市政府動用近五十億元購回隧道經營權,家陣運作都不知幾順暢。南京可以咁做,點解香港唔可以呢?點解研究來研究去都未有結果呢?

有人鬧高官廢廢地,查實廢廢地嘅係成個政府就真,叮佢個鎯鎯!