本文重點
正所謂「人怕出名豬怕肥」,專業會議嘅梁美芬做咗立法會議員後,因為捉老鼠而人氣急升,畀人起咗個朵叫「鼠王芬」,曝光率大增,當然知名度亦隨之上升,本來算係好事,但同時亦惹嚟唔少煩惱。乜事?咪就係有不法之徒冒佢名作惡囉!
帖子被網站刪除
唔講唔知,原來喺舊年暑假,梁美芬曾經被冒名喺街上籌款,佢日前發現喺大學教育資助委員會網站嘅「高等教育論壇」,有一條「Leung Mei Fun」寫嘅帖子被網站刪除,按網站規則,若留言涉及誹謗同粗口等元素,就會被刪除,即係「Leung Mei Fun」嘅留言內容,正當極都有限。
咁啱呢個「Leung Mei Fun」同梁美芬嘅英文姓名寫法相同,梁美芬擔心今次事件係一啲別有用心嘅人,冒用佢嘅名四處作惡,破壞佢個人聲譽,加上有被人冒名街頭籌款前科,見事態嚴重,梁美芬唔敢怠慢,尋日去旺角警署備案,希望借助警力揪出假梁美芬。
立法會依家休會放暑假,梁美芬本來可以暫別議事廳嘅風風雨雨,安靜咁抖吓,點知又發生有人冒名作惡,搞到放假都好唔得閒,又真係好掃興㗎!