尋日凌晨iPhone 4行貨版開售,資訊科技商會會長方保僑都係IT潮人,佢買咗部機後即時喺facebook公布,仲話自己係iPhone死硬派支持者,之前雖然買咗Samsung最新智能手機Galaxy S,但今次都向兩間電訊商訂貨,一部畀自己,另一部幫朋友買。
有說iPhone 4設計有問題,外殼好易花,接收唔多好,但方保僑就話冇有怕,因為早幾個禮拜已去日本買咗幾個iPhone 4外殼,早有準備。佢又話,iPhone 4嘅接收問題同電訊商嘅表現好有關係,出事嗰間美國電訊商表現比較差,加埋先會出大問題;而香港電訊商嘅訊號一般較強,加上用咗外殼,相信唔會有大礙。
佢仲即時展示身上嘅電子產品,原來佢隨身攜帶四部手機同一部iPad。佢玩過部iPhone 4之後,覺得個處理器好勁,畫面又靚,所以即使要凌晨去拎部機都係值得喎!
